Mat aana

Chal tujhe fikr-e-hum na Sahi.. na Sahi,
taalib-e-qalaam iss shehar ki khatir mat aana!

Ghazal khaak ho jaaegi fikr-e-raqeeb se jalkar,
Tumhe kasam hai mehfil me mujh Shayar ki khatir mat aana!

Bahut ho chuka

Aawargi bahut ho chuki... Ab ghar bhi jaae.n
Tuut toh chukay hi hain... Bhikhar bhi jaae.n

Ye bhaag daud ki bahut ho chuki zindagi
Koi intezaar toh ho... Theher bhi jaae.n

Faqeeri, darveshi, ibaadat bhi bahut hui
Rukh-e-naksh karein tabdeel.. sawar bhi jaae.n

Khud Ko bahut samjhaa chuke k uski talab nahi
Guroor-e-khudmukhtaari sir se ab utar bhi jaae

Zindagi se maukay jeenay ke kuchh khaas nahi milay
Ek adad mauka maut de... Toh marr bhi jaae.n!

Al-subah

Al subah ghar se Sukoon kamaane niklay,
Hum phir naseeb-e-ba-azaab Ko aazmaanay niklay!

Be-rabt, be-qarz, Bila yaadaasht hi bhalay thhe hum,
Aaj unse takraa gaye toh sau hisaab puraanay niklay!

Aaj fir usnay humse sar-e-raah na-ashnaai ki,
Aaj fir hum usse yaad maazi dilaanay niklay!

Qalam khamosh ho jaati hai gham ki sohbat k bagair,
Wo chhod kar Gaya toh kitaab bhar taraanay niklay!

Phir chhupkar humne pochh li palkein hijaab se,
Fir muskurahat ka Naqaab, aainay Ko dikhaane niklay!

Tamaam ghar, deewaro-darr dhoonda jinhe bedum,
Wo tere khwaab jummay Ko mere sirhaanay niklay!

Mujhe ilm nahi ke wo mashuk hai ya cigarette...
Kambakht chhuti hai hoto.n ko, aag dil me laga jaati hai! 

Ek baar aaye...

Ghataa na barsay, chahe na bahaar aaye,
Wo chal kar mere darr par ek baar aaye

Muskura do ek baar, kasam hai tumko,
Qatl se pehle ek baar qaraar aaye

Meelo.n ka safar aur haasil anjaam-e-sifar,
Yahaan talak paidal hum bekaar aaye

Nasoor jamaa milkiyat me itne ho gaye,
Unhe bechnay hum aaj bazaar aaye

Lub do wafaa me teri khamosh rahe gumsum,
Warna shikaway hajj ko zubaa.n tak hazaar aaye

Ek umra baad aa rahe iss simt wo dekho,
Thakur uttho rukhsat hone ke aasaar aaye!

Tamasha-gaah

tamaam shaqs qaayad-e-deen se waaqif hain yahaan,
hazaar qatl - ek kalme ko haasil asif hai yahaan,
ye duniya nahi hai ek badnaseeb tamasha-gaah hai ye,
adaakaro se zayad qaabiz munsif hain yahaan!

Sach!

bad-hawaas se rukh, bay-chain behakti nigaahein..
shak hai mujhe ki aaj kuchh sach kahoge tum!